Stillenag

Winkelpop vertoon die trane
wat my sagkens inspireer
om my opsessie met die maanlig
nog een keer te konfronteer
Son skyn teen die muur
waar verrassings en duiwels skuil
en ek groet die nag
terwyl die wolke begin te huil
Wie weet hoe om hulself te vergeef
Ek droom soms alleen
Rivier stamp klippe teen wortels van wilgerboom
En tyd staan stil, maar ek het reeds verloor

Ek staan nou op die drumpel van sonopkoms se leuens.
Waar het jy jou mes gerus?
draai hom nog ‘n keer
Hierdie keer sal jy leer my hart is net ‘n deur
na ‘n kamer vol gedagtes deur geraamtes verskeur.

Tyd stap te vinnig
met elke asem nader na ons terugkeer na sand
Bloedrots wat nooit verander
Stuurman, Seeman roep een laaste keer
in die diepste modderpoele lê my hart steeds en verweer

Ek skree veer hard
Ek skree “Weer Hart!”
Ek skree “ Verweer Hart!”
Ek skree….

Stillenag Donker stemme deur jou
Stillenag Ek voel my bors klop in die
Stillenag Nog een asem vir jou
Stillenag

Rateljagter

Uit die diep van ‘n grot,
sag verweer,
verlaat ‘n druppel

Prag van die son teen donker weer
ek die wolk jy die kleur

Jy en jou reënboog feetjies
Ek en my donker liedjies

Ek is ‘n rooibokkie in leeu se klere
‘n Rateljagter wat skaamloos bewe
Genade onbeskryflik groot
Ek sal nooit wen as jy verloor

Jy en jou reënboog feetjies
Ek en my donker liedjies saam

Ou verlate spore
ruk ons harte heen en weer
Maar alles sal genees
as ons net soos een beweeg

Ons lig soms van die aarde
maar tuimel dan weer neer
Druppels uit die hemel
verpletter teen die teer

Lig jou vere,
sprei my uit
en sweef

Ek en my donker liedjies
Jy en jou reënboog feetjies
Ons en ons lewensdeuntjie saam

Uit die diep van ‘n vlam,
blou bekeer,
vloei ‘n druppel

Son breek deur die donker weer
Ek die wolk
Jy die kleur

Net Ons

Trek my nader
Stoot my weg
en laat my breek

Soos die donker maan met die oseane speel

‘n Twee kleur lewe van swart op rooi
maar met jou hier
lyk alles weer mooi.

Laat my brand ek gloei vir jou
Smulder sing in die môre dou
En as my siel steeds aan die donker klou
begrawe dit hier
net ek en jy weet nou
begrawe hom hier
net ons weet nou

In my drome skilder ek steeds vir jou
Sonder woede, sonder wreed en sonder rou
Bliksemstrale sing in die spoorweghuisie saam
want vanaand is die aand
wat ons letsels vergaan

Laat my brand ek gloei vir jou
Smulder sing in die môre dou
En as my siel steeds aan die donker klou
begrawe dit hier
net ek en jy weet nou
Begrawe hom hier
Net ons weet nou

Sanet se Kind

Sal jy ooit ‘n vliegtuig kan verstaan
Ooit weet waarheen hy gaan

Rukkende winde oor ‘n vol oseaan
en teen dagbreek
sal ons weer jonk wees

Trap saggies as jy loop
Weet jy waar ons die tyd
weer terug kan koop
Ligte antwoorde
Simpel sagte woorde
is van suiwer goud gemaak

Ek is Sanet se kind
Ek speel oor die wêreld wind
op ou geroesde snare
sing in vreemde tale
Selfs as die vlamme woed
en my beklee in roet
sal ek altyd op kan staan
want ek is Sanet se kind

Met wonderwerk-sprokies kan jy toor
Oor bobbejaan-stertjies en geloof
Tussen husse met lang ore
in die pikkewouter-lande
sal ons vreesloos ouer word

Ek is Sanet se kind
Ek speel oor die wêreld wind
op ou geroesde snare
sing in vreemde tale
As oseane blink
my probeer verdrink
sal ek altyd op kan staan
Want ek is Sanet se kind

As ek op die pad myself verloor
Knip my oë, nog ‘n monster dood
Selfs deur die donker stap ons voort
Want jy dra my hart

Ek is Sanet se kind
Ek speel oor die wêreld wind
op ou geroesde snare
sing in vreemde tale
Selfs as storms breek
my oor die grondpad sleep
sal ek altyd op kan staan
Want ek is Sanet se kind